अंगणात माझ्या ।
डेरेदार वृक्ष ।।
सावलीस दक्ष ।
घरासाठी ....।।
अंगणात माझ्या ।
मेंदीचे कुंपण ।।
सडा सारवण ।
दैनंदिन ....।।
अंगणात माझ्या ।
रेखीव रांगोळी ।।
झुलते बंगळी ।
विसावण्या ....।।
अंगणात माझ्या ।
प्राजक्ताचा सडा ।।
दरवळे वाडा ।
सुगंधित ....।।
अंगणात माझ्या ।
शोभे वृंदावन ।।
नक्षीचे कोंदण ।
आच्छादन ....।।
अंगणात माझ्या ।
फुलांचे आगार ।।
फिरती भ्रमर ।
भवताली....।।
अंगणात माझ्या ।
पाखरांची शाळा ।।
गाणी गाती गळा ।
वाऱ्यासंगे ....।।
👍 कविता आवडल्यास कमेंट करा आणि शेअर करा.
डॉ . विनय वसंतराव दांदळे (अकोला)
मो: 9764188106
ईमेल: drvinaydandale@gmail.com
नविन ब्लॉगचे नोटिफिकेशन येण्यासाठी विश्व मराठीच्या ईमेल लिस्टला सबस्क्राइब करा.
Comments