ॐ कार साधना - अत्यंत गुणकारी, साधी, सोपी, बिनखर्चाची चिकित्सा पद्धती...
व्यक्ती तितक्या प्रकृती असे म्हटले जाते. आरोग्य रक्षणासाठी अ‍ॅलोओपॅथी ही एकच चिकित्सा पद्धती नाही. प्राचीन काळापासून भारतामध्ये विविध प्रकारच्या चिकित्सा पद्धती प्रचलित होत्या. त्यामध्ये आयुर्वेद, सिद्धऔषधी, योग, प्राणायाम, चुंबक चिकित्सा इ. अनेक प्रकारच्या पॅथी होत्या. त्यातील एक अत्यंत गुणकारी, साधी, सोपी, बिनखर्चाची चिकित्सा पद्धती म्हणजे ओंकार साधना ! तस बघायला गेल तर ती अष्टांग योगातील एक साधना पद्धती आहे आणि चिकित्सा पद्धती्ही आहे. खरंतर आजार का होतो ? व्याधी कशी निर्माण होते ? शरीरामध्ये दोष कसे निर्माण होतात ? असंतुलन कसे तयार होते ? शारीरिक आजार म्हणजे काय ? मानसिक आजार म्हणजे काय ? मनोकायिक आजार म्हणजे काय ? या गोष्टींबाबत सर्वसामान्यांना खूप कमी माहिती असते.

मानवी शरीर म्हणजे फक्त बॉडी नावाचे यंत्र नसून त्याची रचना पंचकोषांनी बनलेली असते. त्यामध्ये शरीराबरोबर प्राण, मन, बुद्धी, आत्मा इ. तत्वे जोडलेली असतात. तसेच वैश्विक स्पंदने आणि कॉस्मिक एनर्जी यांच्याबरोबरही ते जोडलेले असते. त्याचा परिणाम माणसाच्या मनावर, शरीरावर आणि एकंदरीत आरोग्यावर होत असतो. आधुनिक विज्ञान तर आत्ता म्हणते आहे की Vibrations is Life...! सारे विश्व तरंगयुक्त आहे स्पंदमय आहे.... स्पंदनानी भरलेले आहे.

ओंकार साधना ही फार प्राचीन काळापासून चालत असलेली विश्व स्पंदनांना आपल्या शरीराभोवती कार्यरत करायला उद्युक्त करणारी अशी एक साधना - चिकित्सा पद्धती आहे. ओंकार म्हणजेच प्रणव अर्थात हा विश्वनिर्मिती नंतरचा पहिला ध्वनी आहे असा विश्वास आहे. ओंकार साधना याचा अर्थ ओमकाराच्या उच्चारातून, ओमकाराच्या आवर्तनांमधून आरोग्याचे आणि पंचकोषांचे संतुलन असा आहे. ओंकार साधना अत्यंत प्रभावी असून तिचे मानवी आरोग्याच्या दृष्टीने खूप लाभ आहेत. विशेषता: मनोकायिक म्हणजे सायकोसोमॅटिक ( अर्थात बी.पी., शुगर, हार्ट, कॅन्सर, अ‍ॅसिडिटी, इ.) विकारांमध्ये ओंकार साधना अतिशय उपयुक्त आहे.