🖋️शब्द, भावना व विचारांच्या कलात्मक आणि रचनात्मक मांडणीतून साकारणारे दर्जेदार व अभिजात कवित्व समजून घ्या, अभ्यासा आणि शिका...

एक तिरकस प्रश्न : कविता कुठे 'शिकवून' लिहिता येते का?
उत्तर: होय आणि नाही. दोन्हीही.
प्रश्न: दोन्हीही?
उत्तर: होय. मुळात कविता ज्यांच्या मनात असते, त्यांनाच अधिकचा अभ्यास करण्याची आस असते. कार्यशाळेत कवितेविषयीची दृष्टी, भान, दिशा, काही टिप्स व आस्वादन यांतून कवितेचा 'कान' तयार करता येतो. अशा अभ्यासातून मनातली कविता प्रगल्भ होते. त्यातून स्फूर्ती घेऊन काही जण कविता लिहितात, काही कविता जगतात. काही आस्वादक/उत्तम वाचक होतात. आपल्याला सगळेच हवे आहेत.

सगळ्या ललितकलांच्या बाबतीत शिक्षकाचे महत्त्व दिशादर्शन हेच आहे. (गुरू हा व्यापक अर्थाचा शब्द आहे.) बाकी सत्व आणि स्वत्व ज्याचे त्याचे जन्मदत्त असते. गायकाला 'आपल्याच गळ्याने' गायचे असते. चित्रकाराला कुंचल्यात 'आपल्याच कल्पनांचे रंग' भरायचे असतात. कवीला 'आपल्याच प्रतिभेचा आविष्कार' करायचा असतो. ललितकलांना शॉर्ट कट अमान्य असतो. ललितकला ह्या अंतकरणातून कलारूप घेऊन बाहेर आविष्कृत होतात. त्यामुळे AI सारखे बाहेरून घेतलेले उसनेही इथे कृत्रिम आणि वरवरचे ठरते.
म्हणून वरील प्रश्नाचे उत्तर - "होय"आणि "नाही". असे दोन्हीही आहे.