भारतीय जीवन परंपरेचा पाया म्हणजे सनातन वैदिक संस्कार आणि संस्कृती आहे. दैनंदिन आणि नैमित्तिक पूजा, उपासना हा भारतीय कुटुंब व्यवस्थेचा भाग आहे. मानसिक शांती,  समाधान आणि अपार आनंददायी पूजाविधी ही एक ध्यान पद्धती आहे. पृथ्वी, आप, अग्नी, वायू व आकाश हे महत्त्वाचे पंचमहाभौतिक घटक मानवी जीवन सुसह्य करतात. या घटकांमध्ये पाण्याचे महत्व अनन्यसाधारण आहे. ‘आपो वै सर्वादेवता:’ या वचनानुसार पाण्यामध्ये सर्व देवता निवास करतात.  या जलदेवतेमध्येच सर्व देवतांचे आवाहन करून त्याचे पूजन करणे आणि विशिष्ट मंत्रांनी ते जल अभिमंत्रित करून त्या पाण्याने विविध उपद्रवांचे शमन केले जाते अथवा उपद्रव नष्ट केला जातो.  या विधीला उदकशांति असे म्हणतात. वास्तुशुद्धीसाठी तसेच अनेक असाध्य रोगांचे त्रास कमी करणे, धनधान्य समृद्धी, व्यवसायात यश, व्यवसाय वृद्धी अशा अनेक गोष्टींसाठी उदकशांति केली जाते. नवीन गृहप्रवेशाच्या वेळी वास्तुशांतीचा मुहूर्त नसल्यास उदकशांति  करून नवीन वास्तूत निवास करता येतो. कौटुंबिक स्वास्थ्य हरवणे, संपत्ती न टिकणे, वारंवार आजारपण, नोकरी - व्यवसायात सातत्य नसणे, कुटुंबात कलह, मुलांची अपेक्षित प्रगती न होणे, त्विवाह न होणे, घटस्फोट, अशा अनेक दोषांचे संतुलन उदकशांति  केल्याने होते असे शास्त्र सांगते. कुटुंबातील व्यक्तीचे निधन झाले तर निधनानंतर तेराव्या किंवा चौदाव्या दिवशी वास्तुशुद्धीसाठी उदकशांति  केली जाते. एखाद्या बालकाचा जन्म ठराविक तिथी, नक्षत्र, योग, करण आदि दूषित काळात झाला असेल तर सृष्टीतील पंचमहाभौतिक घटकांची वैश्विक ऊर्जा त्याला पुरेशी मिळत नाही आणि त्या बालकाचा विकास नीट होत नाही. म्हणून जनन शांती करावी लागते, असे प्राचीन शास्त्र सांगते. याबरोबरच सर्व रोग निवारण शांती,  ग्रहशांती,  नक्षत्रशांती असे अनेक शांतीविधी, विवाहविधी,  लघुरुद्र इत्यादी पूजाविधी पौरोहित्य प्रवीण या अभ्यासक्रमात आपल्याला शिकता येणार आहेत. ज्यायोगे आपल्याला यजमानांसाठी या पूजा, विधी, शांती ई. पुराणोक्त पद्धतीने विधीवत करता येतील.