कादंबरी लेखन हा एक अत्यंत विलक्षण असा लेखन प्रकार आहे. लेखकाची प्रतिभा कादंबरी लेखनामध्ये व्यक्त होते. कादंबरीमध्ये जो विषय हाताळायचा आहे त्याचा सर्वकष अभ्यास करणे आवश्यक आहे. कादंबरी लेखनाचे एक विशिष्ठ असे तंत्र आणि मंत्र आहे. आपल्या मनातील विषयाचे आणि कल्पनेचे कादंबरीमध्ये रूपांतर करताना आधी त्याचा आकृतीबंध रेखाटने हे खूप आवश्यक असते. कारण तोच त्याचा गाभा असतो. त्याच प्रमाणे कादंबरीमध्ये येणारे प्रसंग, मुख्य पात्रे, त्यांचे एकमेकातील संबंध, त्यातील उत्कटता आणि भावबंध, पात्रांचे संवाद, भौगोलिक आणि इतर परिस्थिती यांचा साकल्याने विचार करायला लागतो. कादंबरी लेखन ही एक कला आहे तसेच ते एक शास्त्रही आहे तिचा बाज कसा सांभाळतो यावर कादंबरीचे यश अवलंबून आहे.
कोणताही मोठा लेखक जोपर्यंत कादंबरी लिहीत नाही आणि जोपर्यंत त्याची कादंबरी गाजत नाही तोपर्यंत त्याची गणना यशस्वी लेखकांमध्ये होत नाही. अनेकांकडे कादंबरीसाठी अनेक विषय असतात पण ते फुलवायचे कसे आणि त्यांची कादंबरी कशी करायची याचे तंत्र त्यांना अवगत नसते. विश्व मराठी परिषदेने मुद्दाम कादंबरीलेखन कसे करावे? ही कार्यशाळा आयोजित केली आहे. यामध्ये यशस्वी कादंबरीकार आपल्याला बहुमूल्य मार्गदर्शन करतील. त्यातून तुम्हीही यशस्वी कादंबरीकार बनू शकाल.